ماخدش العجوز انا
#بقلم_هناء_زغلول
في بنات كتير بتفتكر انها لما ترتبط وتتجوز براجل اكبر منها بفرق كبير في السن، انها هتلاقي الحنيه والدلع و هتبقي البوبنايه بتاعته اللي هيخاف على زعلها
وفعلا بتقنع نفسها بالكلام دا و بتاخد خطوه الارتباط،
وبعد زي ما بيقولوا👈 الفأس ما بتقع في الرأس، بتشوف حياه تانيه خالص غير اللي كانت متخيلاها، بتشوف شخص شكاك و اناني وعنده حب الأمتلاك،
بيحس انها ملكه هو وبس محدش يقرب منها ولا هي تقرب من حد،
دايما عنده احساس انها ممكن تخونه بسبب فرق السن،
بتعيش في جحيم، وبدل ما تكون البنت الدلوعه بتحس انها عجزت قبل الأوان،
مهما حاولت تراضيه مش هتعرف، هتخاف تهزر معاه بكلمه ويفهما غلط و تجرحه،
هيحطها في القالب اللي يناسبه هو مش اللي يناسب سنها،
هيلجم عفويتها وحيوتها، ولو طلبت منه انه يتنازل شويه عشان خاطرها مش هيوافق،
مش هيفرق معاه خاطرها على قد ما هيفرق معاه وضعه وبرستيجه،
اكيد لكل قاعده استثناء إنما الاغلبيه بيكون عندهم مشكله كبيره بسبب فرق السن المبالغ فيه،
فبلاش نتسرع في قراراتنا مع ان النصيب غلاب بس نتمهل شويه ونحكم عقلنا بدل ما نندم بعد فوات الأوان
