قربت أنحرف
بقلم #هناء_زغلول
زوجات كتير مفتقده الاهتمام من زوجها وبتحاول تلفت انتباهه ليها لمجرد انها تحس بأنوثتها معاه
هي محتاجه الاحساس دا منه هو مش من غيره ..
دايما تطلب منه انه يتكلم معاها وهو يقلل من طلبها و يستخف بيها ويتهمها انها فاضيه ودماغها صغيره وان دماغه مشغوله بحاجات أهم من اللي هي بتطلبه...
ولو جه علي نفسه وقعد معاها هيقولها ها عايزه ايه اخلصي زي ما يكون متغصب وكلامها تقيل عليه ...
ويوم اجازته يفتكر كل مشاويره وينزل طول اليوم
الستات بيكون عندها فراغ وبيطور بعد كده لفراغ عاطفي بيخليها ضعيفه قدام اي كلمه حلوه تسمعها من اي حد ..
وحتي لو هي محافظه علي نفسها وجوزها لكن الإنسان له لحظات ضعف بيمر بيها وكتر القسوه هتخليها تبرر لنفسها اي حاجه والشيطان هيزللها كل العقبات ويخرس صوت ضميرها ولو هي انسانه متدينه هتشغل نفسها وتبعد تفكيرها عن اي أفكار شيطانية....
لكن نيجي لاساس المشكله وهو تكبير دماغ الزوج وانه مش قادر يفهم زوجته واحتياجتها ويديها جزء من وقته يحسسها باهتمامه ويرضي غرورها كأنثي مهما الست كبرت في السن بتحتاج للدلع والحنيه والاحتواء لانها كائن حساس والعاطفه بتتحكم في غرائزها
بلاش تبقي بخيل في احساسك علي اهل بيتك وبره البيت تكون الراجل الجنتلمان اللي بيراعي احساس كل الستات اللي حواليه و تسمع لمشاكلهم و تكون الصديق المخلص الحنين ليهم بردو مراتك ممكن تلاقي صديق يتقرب لها ويسمع مشاكلها زي ما انت كمان بتعمل ما هي الدنيا دواره كل اللي بتعمله بيتردلك
ماتبقاش انت السبب في مداخل الشيطان لأهل بيتك وعف زوجتك زي ما هي بتحافظ عليك وبتعفك...
بلاش تكون انت الاداه لبدايه الانحراف رجع حياتك لمسارها الصحيح كن الزوج والاب وحافظ علي زوجتك