العويل

#

بقلم #هناء_زغلول

كل راجل بيستحل فلوس مراته و يجبرها انها تنزل تشتغل عشان تصرف على بيته وعياله يبقى عويل،

وكل ست بتصرف على راجل وهو قاعد في البيت زي الولايا ما تستهلش التعاطف،

انتي برضاكي بتساعديه على استغلالك، وعايزه تعيشي دور الضحيه، بتبرري إبتزازه ليكي بأن ضل راجل ولا ضل حيطه،

بس للأسف ضل الحيطه افيد منه على الاقل الحيطه ستراكي من عيون الناس وممكن تتسندي عليها إنما دا مافيش منه أي منفعه غير انه عايش عويل عليكي وبيستنزفك، ماديا ونفسيا وجسمانيا،

ايه اللي يجبرك تستحملي واحد بدل ما يشيل همك انتي اللي شيلاه، راجل نساكي انك ست وبقيتي دايره في ساقيه وانتي مغمضه عينك ولاغيه عقلك، و فاكره انك هتاخدي لقب الست الجدعه الاصيله اللي مستحمله جوزها اسفه اني اقولك ان دي مش جدعنه دا انتحار،

لو هتكملي في دور المضحيه هتخسري حياتك ومحدش هيصقفلك ولا هيفتكر تضحيتك،

فوقي لنفسك وطالما بتشقي وتتعبي وشايله نفسك ماتشيليش حمل فوق حملك وتقسمي ضهرك.