(( قَبل الميلاد ))
إيه اللي جرا للناس بالوقت
والعالم ليه اتحوّل غابة
الكُل اتقسّم إلى قُطعان
بيهاجموا فـ بعض كما ديابة
وياريت بالعدل بيتهاجموا
لأ دول أغنيا وَيّا غلابة
واِن حد اِتكلّم فـ الفروقات
يحلفوا رافعين السبابة
دي مواجهة شَريفة
وسويّة
فين المُساواه؟
قولوا فين هيَ!
دي ياحول اللّٰه
فيكوا مَلغيّه
أو يمكن أصلا دي الغيّة
علشان توصلوا للي رَسمتوه
توصلوا لحلول
مَتحلّش .. بتعقّد أكتر
قال إيه مالكين عَقل يفكّر
ويقرر .. ويواجه أزمات
وانتوا حاكمكوا
إعلام ونفوذ وفلوس وشاشات
انا آخر مَرّة حَضرت نقاش
كُنتوا بتتخانقوا على الأموات!
مين فيكُم راح ينهش لَحمُه؟
ومين ياخُد حَقُّه عقار وميراث
العقل مكانُه..
مَبقاش فـ الراس
واتكِسف اذكُر
بقى فين موجود؟
مش خايفة من الوضع الحالي
ولا شاغِل بالي عَدم ووجود
أنا خايفة النار يلمسها وَقود
ونموت سواسية مَشهد واحد
يختلطوا الحاشية مع المماليك
ويُصنّف الغلبان جاحد
ويعيش مَظلوم .. ويموت مَظلوم
ويفوزوا بالضجّة الأوباش
لا نظام ينفع ولا حُكم يقود
والعدل من الرَّكنة يكون باش
نقتل أطفال ونشهّد ناس
إن الواقعة دي نَصيب مَكتوب
ويهدّي التوب ابو عِمّه قُماش
الباقي من الوضع المَقلوب
ويفضّوا بِكارة الموقف
فـ خلال اِسبوع
ويعيدوا القارّة فـ ظرف يومين
تحت رعاية "ماتوا من الجوع"
اِتبرع لجل نعيد اِحياء
امواتنا الفُقرا فـ الفقرة
ونلِم فلوس تنفع أهاليهُم
لو من غيرهُم جِه بُكرة
بُكرة اللي زمان كان بِكر وخير
وحقوقهُم فيه كانت حاضرة
قارنوا الأوضاع .. شوفوا التغيير
اللي شاركنا فيه بالفِطرة
واِزّاي اِتحوّل العالم
من وَضع سَليم .. للوضع الكَسر
"قَبل الميلاد"
كانت السنين بتمشي عَكس
دلوقتي مَعدولة السنين
وكُل شيء بَقى ماشي عَكس
