معظم الأجيال القديمه اتجوزوا جواز صالونات يعني مافيش قصه حب تربطهم ... وبيتقفل عليهم باب وبيخلفوا صبيان وبنات والحياه بتمشي ...
محدش جه في باله يسأل شريك حياته انت فعلا بتحبني؟
ولا يسأل نفسه انا بحب اللي معايا ؟
سؤال لو وقفنا عنده وصممنا علي معرفه إجابته بيوت كتير هتتهد ....
ممكن بسبب ان مافيش اجابه
او لان محدش فعلا عارف يقيم احساسه تجاه التاني
او محدش اتحط تحت اختبار بجد وجاتله فرصه انه يتعامل مع شخص جديد وينجذب له .
بتعيش حياتك كلها وانت مش عارف اللي بينكم دا حب ولا عٍشره،
لكن في نتيجه حتميه وهي التعود علي الأشياء والأشخاص بيعمل ترابط روحاني من نوع خاص بتحس انك مش هتقدر تتعامل مع حد تاني غير الشخص اللي عاشرته لسنين طويله وفهمت طبعه و عيوبه ومميزاته ...
بتكون خلاص استسلمت ومعندكش طاقه تغامر وتدخل تجربه جديده ...
وكل دا تحت مسمي العٍشره مش الحب
كتير مننا بيبقي عايز يصدق انه بيحب... وفي اللي بيتوهم حاله الحب، لأن نماذج الحب في الزواج قليله، الحب بمعناه الحقيقي مش الكلمه اللي بتتقال في لحظه روقان
الحب الحقيقي اللي بيبان وقت المرض والحزن، وقت ما تنطفي وحبيبك الوحيد اللي شايفك منور ...وقت ما تنكسر وهو اللي يسندك لما الكل يسيبك... الحب اللي بتحسه في نظره العين ولمسه الايد ....
العٍشره اللي بين الأزواج أوقات بتكون اقوي من الحب وهي اللي بتعمر البيوت وبتحافظ عليها
بلاش ندور علي مسمي للارتباط سواء حب او عٍشره الاهم الرضا بالمقسوم