ثواني أفهم
ده عمري بجد؟!
بقيت كام وأربعين فعلًا!
ده حصل إزاي؟!
وإمتى بس؟
أكيد في غلطة
في حسابكم
يا ريت بالله تراجعوها
أكيد في حاجة نسيتوها
بقي بالذمة ده شكل
أربعين إزاي
إيه الشعر الأبيض ده؟
وليه الصورة مش واضحة؟
وأصلًا فين بقية الشعر
أنا غير اللي شايفه الوقتي
في مرايتي
أنا شكلي ماهوش راكب على
حكايتي
أكيد ده حلم مش أكتر
وهو ينفع إني أكبر
بدون ما أحس
أكيد إنتوا اللي بتخموا
تخيّل شاب من سنك
يقولك فجأة يا عمو
يا عمر وراح في تغفيلة
سنين ضاعت في تعسيلة
بتجري الدنيا مش لاحقين
وروح بنجرها عليلة
وأنا لو هحسب الأيام
وأشوف كام ليلة عدوا سُلام
يا دوب كام يوم هيتحسبوا
وباقي العمر مش فاكره
ولا عيشته ولا في أحلام
ثواني أفهم
كام و٤٠
محمد شحاته