كتبت: هناء زغلول
زي مافيه رجاله عينها زايغه في كمان ستات عينها زايغه ما احنا كلنا بشر ونفوسنا ضعيفه ولينا لحظات ضعف مافيش فرق في الاحساس والشعور بين راجل وست .
الغرائز بتتحكم في تصرفات البشر مع اختلاف الجنس
بس في فرق بين ست بطبيعتها عينها زايغه وبين ست اتعرضت لضغط نفسي وصلها للنظر لغير زوجها
في الحالتين في معصيه للخالق زي اي معصيه بيقع فيها الإنسان بسبب ضعفه او قله إيمانه او اي سبب يوقعنا في المعاصي .. يعني اي كلام هنقوله في الموضوع دا مش مبرر للمعصيه إنما دا واقع وبيحصل وبنحاول نعرض المشكله و نبحث لها عن حل
اولا في سؤال بيفرض نفسه
ليه الست ممكن تنجذب لحد تاني غير زوجها ؟
للاجابه عن السؤال لازم نفرق بين ست بتنجذب لشخص آخر لان بطبعها عينها زايغه
وست زوجها كان هو السبب وراء انجذابها لغيره
في حالات بيكون سوء معامله الزوج و التقليل من شأن زوجته واهماله لها بيعمل فتور في العلاقه بينهم بيحسسها انها شئ غير مهم في حياته و كأنها قطعه جماد
فيبتدي يبعد عنها و الزوجه تحاول تشغل نفسها
وتختلط برجال في محيط العمل أو الأقارب او الانديه
والاحتكاك هيقربها من ناس عمرها ما كانت بتفكر فيهم بس الفراغ العاطفي والإحساس بالقهر بيكون سبب انجذابها لأي شخص هتتقرب منه وهتكون ضعيفه الإرادة
النوع دا من الستات بتكون في صراع نفسي بين تربيتها واخلاقها اللي اتربت عليها وخوفها من ربنا وبين إحساسها بالانتقام من زوجها اللي حاسه تجاهه بالقهر والذل
وغالبا بترجح كفه اخلاقها وضميرها وتكتفي بأن تكتم مشاعرها داخلها وما تصرحش بيها...
النوع التاني اللي الست بطبعها عينها زايغه دي بتكون مريضه نفسيه عندها عقده نقص بتحب تشبع رغبتها في نظره كل راجل ليها و انه يتغزل في مفاتنها
مش عايزه تحس انها انطفت او عامل السن أثر عليها ..وممكن تكون مراهقه متأخره زي اللي بيحصل للرجاله بالظبط..
بس بما اننا مجتمع شرقي ما نقدرش نصرح بكلام زي دا ولا نواجهه نفسنا ان في مشكله زي دي موجوده في مجتمعانا
بالعكس كل ما نواجهه مشاكلنا و نعترف بيها هندور لها علي حلول و نعالجها قبل فوات الأوان
ونصيحتي لكل راجل وست راعوا ربنا في بعض
دوروا علي الحلو اللي جوه كل واحد حاولوا تحتوا بعض قبل ما تبقوا زي الاغراب وعايشيين في بيت واحد